മുംബൈ: റെയിൽവേ റിസർവേഷൻ സംവിധാനത്തിൽ മുതിർന്ന പൗരന്മാർക്ക് (Senior Citizens) കോവിഡ് കാലത്തിന് മുമ്പ് ലഭിച്ചിരുന്ന യാത്രാനിരക്കിളവ് പുനഃസ്ഥാപിക്കണമെന്നാവശ്യപ്പെട്ട് കേരളീയ കൾച്ചറൽ സൊസൈറ്റി (KCS) പൻവേൽ രാഷ്ട്രപതി, പ്രധാനമന്ത്രി, കേന്ദ്ര റെയിൽവേ മന്ത്രി, റെയിൽവേ ബോർഡ് ചെയർമാൻ എന്നിവർക്കു നിവേദനം സമർപ്പിച്ചു.
കോവിഡ് മഹാമാരിക്കാലത്ത് സ്ഥിരം സർവീസുകൾക്ക് പകരം പ്രത്യേക ട്രെയിനുകൾ മാത്രമാണ് സർവീസ് നടത്തിയിരുന്നത്. ഈ കാലയളവിൽ മുതിർന്ന പൗരന്മാർക്ക് അനുവദിച്ചിരുന്ന യാത്രാ ഇളവ് നിർത്തിവെച്ചിരുന്നു. എന്നാൽ, കോവിഡ് നിയന്ത്രണങ്ങൾ പൂർണമായി പിൻവലിക്കുകയും ട്രെയിൻ സർവീസുകൾ സാധാരണ നിലയിലേക്ക് മടങ്ങുകയും ചെയ്തിട്ടും മുതിർന്ന പൗരന്മാർക്കുള്ള ഇളവ് ഇതുവരെ പുനഃസ്ഥാപിച്ചിട്ടില്ലെന്ന് കെ.സി.എസ്. ചൂണ്ടിക്കാട്ടി.
രാജ്യത്തെ ലക്ഷക്കണക്കിന് മുതിർന്ന പൗരന്മാർക്ക് ഇത് സാമ്പത്തിക ബുദ്ധിമുട്ട് സൃഷ്ടിക്കുന്ന സാഹചര്യത്തിൽ, യാത്രാനിരക്കിളവ് എത്രയും വേഗം പുനരാരംഭിക്കണമെന്ന് സംഘടന ആവശ്യപ്പെട്ടു. ഇക്കാര്യത്തിൽ അടിയന്തര നടപടി സ്വീകരിക്കണമെന്നാവശ്യപ്പെട്ട് കേന്ദ്ര സർക്കാരിന് വീണ്ടും കത്തയച്ചതായും കെ.സി.എസ്. അറിയിച്ചു.
ഈ വിഷയത്തിൽ അനുകൂല തീരുമാനം ഉണ്ടാകാത്ത പക്ഷം പൻവേൽ റെയിൽവേ സ്റ്റേഷനു മുന്നിൽ പ്രതിഷേധ സമരവും ധർണയും സംഘടിപ്പിക്കാൻ നിർബന്ധിതരാകുമെന്ന് സംഘടന മുന്നറിയിപ്പ് നൽകി.
കേരളീയ കൾച്ചറൽ സൊസൈറ്റി പൻവേൽ പ്രസിഡന്റ് മനോജ് കുമാർ എം.എസ് (99673 74240), സെക്രട്ടറി മുരളി കെ. നായർ (93249 29130) എന്നിവരാണ് ഇക്കാര്യം അറിയിച്ചത്.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
