രാജ്യത്ത് കുടിശ്ശികയായി കിടക്കുന്ന ട്രാഫിക് ഇ-ചലാൻ പിഴ ഈടാക്കുന്നതിനുള്ള മാർഗങ്ങൾ സംസ്ഥാനങ്ങളും കേന്ദ്രഭരണ പ്രദേശങ്ങളും കണ്ടെത്തണമെന്ന് സുപ്രീം കോടതി നിർദേശിച്ചു. ഏകദേശം 20,000 കോടി രൂപയുടെ പിഴ ഇനിയും ഈടാക്കാനുണ്ടെന്ന വിവരത്തെ തുടർന്നാണ് കോടതിയുടെ നിർദേശം.
ഗതാഗത നിയമലംഘനങ്ങൾ ഇലക്ട്രോണിക് സംവിധാനത്തിലൂടെ കണ്ടെത്തുകയും ഇ-ചലാൻ വഴി പിഴ ചുമത്തുകയും ചെയ്യുന്ന നടപടിയുമായി ബന്ധപ്പെട്ട ഹർജി പരിഗണിക്കുകയായിരുന്നു ജസ്റ്റിസുമാരായ ജെ. ബി. പർദിവാല, കെ. വി. വിശ്വനാഥൻ എന്നിവരടങ്ങിയ ബെഞ്ച്.
സംസ്ഥാനങ്ങളും കേന്ദ്രഭരണ പ്രദേശങ്ങളും ചേർന്ന് ഏകദേശം 45,000 കോടി രൂപയുടെ ഇ-ചലാൻ പിഴ ഈടാക്കാനുണ്ടെന്നും, ഇതിൽ 25,000 കോടി രൂപയോളം ഇതിനകം പിരിച്ചെടുത്തിട്ടുണ്ടെന്നും കോടതിയെ അറിയിച്ചു.
ഇ-ചലാൻ പുറപ്പെടുവിക്കുന്നതിൽ മാത്രം നടപടികൾ അവസാനിക്കരുതെന്നും, ചുമത്തുന്ന പിഴ യഥാസമയം ഈടാക്കുന്നതിനുള്ള ഫലപ്രദമായ സംവിധാനമാണ് ആവശ്യമെന്നും കോടതി നിരീക്ഷിച്ചു.
കുടിശ്ശികയായ ട്രാഫിക് പിഴ ഈടാക്കുന്നതിനുള്ള വിവിധ മാർഗങ്ങളും കോടതി പരിഗണിച്ചു. ഇതിന്റെ ഭാഗമായി, അടയ്ക്കാത്ത ട്രാഫിക് ചലാൻ വൈദ്യുതി ബില്ലുമായി ബന്ധിപ്പിക്കുന്നതിനെക്കുറിച്ചും കോടതി നിർദേശം മുന്നോട്ടുവച്ചു.
ട്രാഫിക് പിഴ അടയ്ക്കാത്തവരുടെ വൈദ്യുതി കുടിശ്ശികയിൽ അത് ഉൾപ്പെടുത്തുന്ന സംവിധാനം പരിഗണിക്കാമെന്നായിരുന്നു കോടതിയുടെ നിർദേശം. എന്നാൽ ഇത് കോടതി മുന്നോട്ടുവച്ച ഒരു മാർഗം മാത്രമാണ്; നടപ്പാക്കാനുള്ള അന്തിമ ഉത്തരവായി ഇതിനെ കാണാനാകില്ല.
2012ൽ കോയമ്പത്തൂർ സ്വദേശിയായ ഓർത്തോപീഡിക് സർജൻ എസ്. രാജശേഖരൻ സമർപ്പിച്ച റോഡ് സുരക്ഷ സംബന്ധമായ ദീർഘകാല പൊതുതാൽപ്പര്യ ഹർജിയുടെ ഭാഗമായാണ് വിഷയം സുപ്രീം കോടതിയുടെ പരിഗണനയിലെത്തിയത്.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI
Every Saturday | 4:30 PM | Kairali News
