പ്രവാസി ഇൻഷുറൻസ് പദ്ധതിയുടെ പ്രീമിയത്തിൽ വരുത്തിയ വൻ വർധനവിലും പ്രവാസി ക്ഷേമ പെൻഷൻ വിതരണത്തിലെ കാലതാമസത്തിലും കേരളീയ കേന്ദ്ര സംഘടന ശക്തമായ പ്രതിഷേധം രേഖപ്പെടുത്തി. പ്രവാസികളുടെ ക്ഷേമവും സാമ്പത്തിക സുരക്ഷയും ഉറപ്പാക്കേണ്ട സർക്കാർ സംവിധാനങ്ങൾ തന്നെ പ്രവാസികൾക്ക് അധിക സാമ്പത്തികഭാരവും പ്രയാസങ്ങളും സൃഷ്ടിക്കുന്ന സാഹചര്യം ആശങ്കാജനകമാണെന്ന് സംഘടന ചൂണ്ടിക്കാട്ടി.

അഞ്ച് ലക്ഷം രൂപയുടെ ഇൻഷുറൻസ് പരിരക്ഷയ്ക്കായി കഴിഞ്ഞ വർഷം ഒരു കുടുംബത്തിന് വാർഷിക പ്രീമിയമായി ഏകദേശം 13,400 രൂപയായിരുന്ന സ്ഥാനത്ത്, നിലവിൽ പ്രായപരിധിക്ക് അനുസരിച്ച് 30,000 രൂപ മുതൽ 60,000 രൂപ വരെ പ്രീമിയം നിശ്ചയിച്ചിരിക്കുന്നത് പ്രവാസികൾക്ക് കനത്ത സാമ്പത്തിക ബാധ്യതയാണ് സൃഷ്ടിച്ചിരിക്കുന്നത്.

നിലവിലുണ്ടായിരുന്ന ഇൻഷുറൻസ് പദ്ധതികൾ അവസാനിപ്പിച്ചാണ് നിരവധി പ്രവാസികൾ പുതിയ സർക്കാരിന്റെ ഇൻഷുറൻസ് പദ്ധതിയിൽ അംഗങ്ങളായത്. മുൻപുണ്ടായിരുന്ന പദ്ധതികൾ ഉപേക്ഷിച്ച് പുതിയ പദ്ധതിയിൽ വിശ്വാസമർപ്പിച്ച പ്രവാസികൾക്ക് ഇപ്പോൾ പ്രീമിയത്തിൽ ഇത്രയധികം വർധനവ് നേരിടേണ്ടിവരുന്നത് കടുത്ത ആശങ്കയ്ക്കും സാമ്പത്തിക പ്രയാസങ്ങൾക്കും ഇടയാക്കിയിരിക്കുകയാണ്. മുൻപത്തെ പദ്ധതികൾ ഉപേക്ഷിച്ച് പുതിയ പദ്ധതിയിൽ ചേർന്നവർക്ക് ഉണ്ടായ ഈ മാറ്റം അവരുടെ ഇൻഷുറൻസ് പരിരക്ഷയും കുടുംബത്തിന്റെ സാമ്പത്തിക ആസൂത്രണവും പ്രതികൂലമായി ബാധിക്കുന്ന സാഹചര്യമാണുള്ളത്.

വിദേശരാജ്യങ്ങളിൽ അധ്വാനിച്ച് കുടുംബത്തിന്റെ സുരക്ഷയ്ക്കും നാടിന്റെ സാമ്പത്തിക പുരോഗതിക്കും സംഭാവന നൽകുന്ന പ്രവാസികൾക്ക് താങ്ങാനാവുന്ന നിരക്കിൽ ഇൻഷുറൻസ് പരിരക്ഷ ഉറപ്പാക്കുകയാണ് വേണ്ടത്. അതിനാൽ, പ്രീമിയം വർധനവ് അടിയന്തരമായി പുനഃപരിശോധിച്ച് താങ്ങാനാവുന്ന നിരക്കിൽ ഇൻഷുറൻസ് പരിരക്ഷ ലഭ്യമാക്കാനും പുതിയ പദ്ധതിയിൽ ചേർന്ന പ്രവാസികളുടെ താൽപ്പര്യങ്ങൾ സംരക്ഷിക്കാനും ബന്ധപ്പെട്ട അധികാരികൾ നടപടി സ്വീകരിക്കണമെന്ന് സംഘടന ആവശ്യപ്പെട്ടു.

മുൻ സർക്കാരിന്റെ കാലത്ത് എല്ലാ മാസവും കൃത്യമായി വിതരണം ചെയ്തുകൊണ്ടിരുന്ന പ്രവാസി ക്ഷേമ പെൻഷൻ, നിലവിലെ സർക്കാർ അധികാരത്തിൽ വന്നതിനുശേഷം ക്രമരഹിതമായതായും ഗുണഭോക്താക്കൾ സാമ്പത്തിക പ്രയാസം നേരിടുന്നതായും സംഘടന ചൂണ്ടിക്കാട്ടി.

2026 മെയ് മാസം മുതൽ പെൻഷൻ വിതരണത്തിൽ കുടിശ്ശിക ഉണ്ടായ സാഹചര്യത്തിൽ, ഇതുവരെ ആകെ മൂന്ന് മാസത്തെ പെൻഷൻ തുക മാത്രമാണ് വിതരണം ചെയ്തിട്ടുള്ളത്. നിലവിൽ മൂന്ന് മാസത്തെ പെൻഷൻ തുക കൂടി കുടിശ്ശികയുള്ളത് പെൻഷനെ ആശ്രയിച്ച് കഴിയുന്ന പ്രവാസികൾക്ക് വലിയ ബുദ്ധിമുട്ടാണ് സൃഷ്ടിച്ചിരിക്കുന്നത്.

കുടിശ്ശികയായ മുഴുവൻ പെൻഷൻ തുകയും അടിയന്തരമായി വിതരണം ചെയ്യുന്നതിനൊപ്പം, തുടർന്നുള്ള മാസങ്ങളിൽ പെൻഷൻ മുടക്കമില്ലാതെ ലഭ്യമാക്കുന്നതിനും സർക്കാർ നടപടി സ്വീകരിക്കണം. കൂടാതെ, പ്രവാസി ക്ഷേമ പെൻഷൻ വിതരണ തീയതിയിൽ ഏകീകരണം വരുത്തി എല്ലാ മാസവും ഒരു നിശ്ചിത തീയതിയിൽ പെൻഷൻ വിതരണം ചെയ്യുന്നതിനുള്ള സ്ഥിരമായ സംവിധാനം ഏർപ്പെടുത്തണമെന്നും സംഘടന ആവശ്യപ്പെട്ടു. വിതരണ തീയതിയിലെ അനിശ്ചിതത്വം ഒഴിവാക്കി ഗുണഭോക്താക്കൾക്ക് കൃത്യസമയത്ത് പെൻഷൻ ലഭിക്കുന്നുവെന്ന് ഉറപ്പാക്കേണ്ടത് സർക്കാരിന്റെ ഉത്തരവാദിത്വമാണെന്നും സംഘടന ചൂണ്ടിക്കാട്ടി.

പ്രവാസി ഇൻഷുറൻസ് പ്രീമിയത്തിലെ വർധനവ് പുനഃപരിശോധിക്കുക, ക്ഷേമ പെൻഷൻ കുടിശ്ശിക പൂർണമായി വിതരണം ചെയ്യുക, പെൻഷൻ വിതരണ തീയതിയിൽ ഏകീകരണം വരുത്തി പ്രതിമാസ വിതരണം ഉറപ്പാക്കുക എന്നീ ആവശ്യങ്ങൾ ഉന്നയിച്ച് കേരളീയ കേന്ദ്ര സംഘടനയുടെ നേതൃത്വത്തിൽ ബഹുമാനപ്പെട്ട കേരള മുഖ്യമന്ത്രിക്ക് നിവേദനം നൽകുന്നതാണ്.

പ്രവാസികളുടെ ക്ഷേമവും അവകാശങ്ങളും സംരക്ഷിക്കുന്നതിനായി സർക്കാർ അടിയന്തരവും ഫലപ്രദവുമായ നടപടികൾ സ്വീകരിക്കണമെന്ന് കേരളീയ കേന്ദ്ര സംഘടനയ്ക്കുവേണ്ടി പ്രസിഡന്റ് ടി. എൻ. ഹരിഹരൻ ആവശ്യപ്പെട്ടു.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News