പുണെ, സോലാപുർ യാത്രക്കാർക്കും നേട്ടം; ആഴ്ചയിൽ ആറു ദിവസം സർവീസ്, 823 യാത്രക്കാർക്ക് സൗകര്യം

ബെംഗളൂരു: മുംബൈ-ബെംഗളൂരു വന്ദേഭാരത് സർവീസ് നവംബർ മൂന്നു മുതൽ. ബെംഗളൂരുവിനും മുംബൈയ്ക്കുമിടയിൽ യാത്രക്കാർക്ക് ആശ്വാസമായി പുതിയ ട്രെയിൻ സർവീസ് ആരംഭിക്കുന്നു. നവംബർ ഒന്നിന് ബെംഗളൂരു റെയിൽവേ സ്റ്റേഷനിൽ രാവിലെ 11.30-ന് പുതിയ ട്രെയിൻ സർവീസിന്റെ ഉദ്ഘാടനം നടക്കും. റായ്ച്ചൂരു, യാദ്ഗിർ, കലബുറഗി, സോലാപുർ, പുണെ എന്നിവിടങ്ങളിൽ സ്വീകരണം ഏറ്റുവാങ്ങിയ ശേഷമായിരിക്കും ഉദ്ഘാടന ഓട്ടം മുംബൈയിലെത്തുക. പുലർച്ചെ മൂന്നുമണിയോടെ മുംബൈയിൽ എത്തുമെന്നാണ് അറിയിച്ചിരിക്കുന്നത്.

ആഴ്ചയിൽ ആറു ദിവസമായിരിക്കും ട്രെയിൻ സർവീസ് നടത്തുക. ബെംഗളൂരുവിൽനിന്ന് മുംബൈയിലേക്കുള്ള സർവീസ് തിങ്കളാഴ്ചകളിൽ ഉണ്ടായിരിക്കില്ല. മുംബൈയിൽനിന്ന് ബെംഗളൂരുവിലേക്കുള്ള സർവീസ് ചൊവ്വാഴ്ചകളിലും ഉണ്ടാകില്ല. പുണെ, സോലാപുർ തുടങ്ങിയ പ്രധാന സ്റ്റേഷനുകളിൽനിന്ന് യാത്ര ചെയ്യുന്നവർക്ക് രാത്രികാല യാത്രയും തുടർയാത്രയ്ക്കുള്ള കണക്ഷൻ സൗകര്യങ്ങളും പ്രയോജനപ്പെടുത്താൻ കഴിയുന്ന രീതിയിലാണ് സമയക്രമം.

രാത്രിയാത്ര, പകൽ ലക്ഷ്യസ്ഥാനത്ത്

ബെംഗളൂരുവിൽനിന്ന് വൈകുന്നേരം 7.45-ന് പുറപ്പെടുന്ന ട്രെയിൻ നമ്പർ 27652, അടുത്ത ദിവസം രാവിലെ 4.20-ന് സോലാപുരിലെത്തും. രാവിലെ എട്ടുമണിക്ക് പുണെയിലും 11.55-ന് മുംബൈയിലും എത്തിച്ചേരും.

മുംബൈയിൽനിന്ന് ബെംഗളൂരുവിലേക്കുള്ള മടക്ക സർവീസ് ട്രെയിൻ നമ്പർ 27651 രാത്രി 8.10-ന് പുറപ്പെടും. രാത്രി 11.40-ന് പുണെയിലും പുലർച്ചെ മൂന്നുമണിക്ക് സോലാപുരിലും എത്തും. തുടർന്ന് ഉച്ചയോടെ ബെംഗളൂരുവിലെത്തും.

രാത്രിയിൽ യാത്ര ആരംഭിച്ച് അടുത്ത ദിവസം പകൽ ലക്ഷ്യസ്ഥാനത്തെത്താൻ കഴിയുന്ന സമയക്രമം ബെംഗളൂരു–മുംബൈ യാത്രക്കാർക്ക് ഏറെ പ്രയോജനകരമാകുമെന്നാണ് പ്രതീക്ഷ.

16 കോച്ചുകൾ; 823 യാത്രക്കാർക്ക് യാത്രാസൗകര്യം

ആകെ 16 കോച്ചുകളാണ് പുതിയ ട്രെയിനിലുണ്ടാവുക. 823 യാത്രക്കാരെ ഉൾക്കൊള്ളാൻ ശേഷിയുള്ള ട്രെയിനിൽ വിവിധ വിഭാഗങ്ങളിലായി എ.സി. ബെർത്ത് സൗകര്യങ്ങളാണ് ഒരുക്കിയിരിക്കുന്നത്.

611 ബെർത്തുകളുള്ള 11 എ.സി. ത്രീ ടയർ കോച്ചുകൾ, 188 ബെർത്തുകളുള്ള നാല് എ.സി. ടു ടയർ കോച്ചുകൾ, 24 ബെർത്തുകളുള്ള ഒരു ഫസ്റ്റ് ക്ലാസ് എ.സി. കോച്ച് എന്നിവയാണ് ട്രെയിനിലുണ്ടാവുക.

ബെംഗളൂരു, മുംബൈ എന്നീ പ്രധാന നഗരങ്ങൾക്കിടയിലെ യാത്രാസൗകര്യം മെച്ചപ്പെടുത്തുന്നതിനൊപ്പം റായ്ച്ചൂരു, യാദ്ഗിർ, കലബുറഗി, സോലാപുർ, പുണെ തുടങ്ങിയ നഗരങ്ങളിലെ യാത്രക്കാർക്കും പുതിയ സർവീസ് പ്രയോജനപ്പെടും.

പ്രത്യേകിച്ച് രാത്രി യാത്രയ്ക്ക് മുൻഗണന നൽകുന്നവർക്കും ബിസിനസ്, ജോലി ആവശ്യങ്ങൾക്കായി ഇരു നഗരങ്ങൾക്കുമിടയിൽ സ്ഥിരമായി യാത്ര ചെയ്യുന്നവർക്കും പുതിയ ട്രെയിൻ സർവീസ് സഹായകരമാകും.

ബെംഗളൂരു–മുംബൈ യാത്രയിൽ പുതിയൊരു അധ്യായത്തിന് തുടക്കമിടുന്ന സർവീസ് ദക്ഷിണേന്ത്യയിലെയും മഹാരാഷ്ട്രയിലെയും പ്രധാന നഗരങ്ങൾ തമ്മിലുള്ള റെയിൽ ഗതാഗത ബന്ധം കൂടുതൽ ശക്തമാക്കുമെന്നാണ് പ്രതീക്ഷ.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News