നോർക്ക കെയർ ഇൻഷുറൻസിന്റെ വാർഷിക പ്രീമിയത്തിൽ കേരള സർക്കാർ വരുത്തിയ അശാസ്ത്രീയവും ക്രമരഹിതവുമായ വർധനയിൽ ബോംബെ കേരളീയ സമാജം ഭരണസമിതി ശക്തമായ പ്രതിഷേധം രേഖപ്പെടുത്തി.
സമാജം വൈസ് പ്രസിഡന്റ് ക്യാപ്റ്റൻ കെ. ദേവദാസിന്റെ അധ്യക്ഷതയിൽ ചേർന്ന യോഗത്തിൽ, പ്രീമിയം വർധന പിൻവലിച്ച് നിരക്ക് മുൻകാല പ്രാബല്യത്തോടെ പൂർവസ്ഥിതിയിലാക്കണമെന്നും പദ്ധതി കൂടുതൽ ജനകീയമാക്കണമെന്നും ആവശ്യപ്പെട്ട് സമാജം സെക്രട്ടറി എ.ആർ. ദേവദാസ് അവതരിപ്പിച്ച പ്രമേയം യോഗം ഐകകണ്‌ഠ്യേന അംഗീകരിച്ചു.
ഇതുസംബന്ധിച്ച് കേരള മുഖ്യമന്ത്രിക്കും ഗവർണർക്കും നിവേദനങ്ങൾ അയക്കാനും യോഗം തീരുമാനിച്ചു. ആവശ്യം നേരിട്ട് അധികൃതരുടെ ശ്രദ്ധയിൽപ്പെടുത്തുന്നതിനും തുടർനടപടികൾ വേഗത്തിലാക്കുന്നതിനുമായി തിരുവനന്തപുരത്തെത്തി ബന്ധപ്പെട്ടവരെ കാണാൻ സമാജം പ്രസിഡന്റ് ഡോ. എസ്. രാജശേഖരൻ നായരെ യോഗം ചുമതലപ്പെടുത്തി.
കഴിഞ്ഞ നിരവധി വർഷങ്ങളായി അംഗങ്ങൾക്കിടയിൽ നോർക്ക പദ്ധതികളെക്കുറിച്ച് സമാജം നടത്തിയ ബോധവൽക്കരണ പ്രവർത്തനങ്ങളിലൂടെ നൂറുകണക്കിന് പേർ നോർക്ക തിരിച്ചറിയൽ കാർഡ് കരസ്ഥമാക്കിയിട്ടുണ്ട്. നിരവധി പേർ നോർക്ക കെയർ ഇൻഷുറൻസ് പരിരക്ഷയുടെ ഗുണഭോക്താക്കളായിട്ടുമുണ്ട്.
പ്രവാസി മലയാളികൾക്ക് ഏറെ പ്രയോജനകരമായ നോർക്ക കെയർ പദ്ധതിയുടെ പ്രീമിയം വർധന സാധാരണക്കാരായ പ്രവാസികൾക്ക് അധിക സാമ്പത്തിക ബാധ്യതയുണ്ടാക്കുമെന്നും പദ്ധതി കൂടുതൽ ജനങ്ങൾക്ക് പ്രാപ്യമാക്കുന്ന തരത്തിൽ സർക്കാർ അടിയന്തരമായി ഇടപെടണമെന്നും സമാജം ഭരണസമിതി ആവശ്യപ്പെട്ടു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News
