മൊബൈൽ ഫോണും പണവും എടിഎം കാർഡും ആഭരണങ്ങളും നഷ്ടമായി; യാത്രക്കാരുടെ സുരക്ഷയിൽ ആശങ്ക
രത്നഗിരി: കൊങ്കൺ റെയിൽവേ പാതയിൽ ട്രെയിൻ യാത്രക്കാരെ ഭീതിയിലാഴ്ത്തി മോഷണപരമ്പര തുടരുന്നു. ഏറ്റവും ഒടുവിൽ മുംബൈ എൽടിടി–കൊച്ചുവെളി സൂപ്പർഫാസ്റ്റ് എക്സ്പ്രസിൽ യാത്ര ചെയ്യുകയായിരുന്ന മലയാളി കുടുംബത്തിന്റെ ഹാൻഡ് ബാഗാണ് മോഷണം പോയത്. യാത്രയ്ക്കിടെ കുടുംബാംഗങ്ങൾ ഉറങ്ങിക്കിടന്ന സമയത്തായിരുന്നു കവർച്ച. മൊബൈൽ ഫോൺ, പണം, എടിഎം കാർഡ്, വെള്ളി ആഭരണം എന്നിവയുൾപ്പെടെ ഏകദേശം 25,000 രൂപയുടെ നഷ്ടമുണ്ടായതായി കുടുംബം അറിയിച്ചു.
രത്നഗിരിയിൽ സ്ഥിരതാമസമാക്കിയ ഷാജു മോനും ഭാര്യ ഷൈനിയും മകൻ ജിയോയും എറണാകുളത്തേക്ക് യാത്ര ചെയ്യുന്നതിനിടെയാണ് സംഭവം. ഒക്ടോബർ 27-ന് രാത്രി 11.30-ന് രത്നഗിരിയിൽ നിന്ന് 22113 നമ്പർ മുംബൈ എൽടിടി–കൊച്ചുവെളി സൂപ്പർഫാസ്റ്റ് എക്സ്പ്രസിൽ കയറിയ കുടുംബം യാത്രയ്ക്കിടെ ഉറങ്ങുകയായിരുന്നു. ഒക്ടോബർ 28-ന് രാവിലെ 5.30-ന് ട്രെയിൻ മഡ്ഗാവിൽ എത്തിയപ്പോഴാണ് ഷൈനിയുടെ ഹാൻഡ് ബാഗ് കാണാനില്ലെന്ന വിവരം ശ്രദ്ധയിൽപ്പെട്ടത്.
ബാഗിലുണ്ടായിരുന്ന മൊബൈൽ ഫോൺ, 3,000 രൂപ, എടിഎം കാർഡ്, വെള്ളി നെക്ലേസ് എന്നിവയാണ് നഷ്ടപ്പെട്ടത്. സംഭവത്തെ തുടർന്ന് ആദ്യം റെയിൽ മദദ് സംവിധാനത്തിലൂടെ പരാതി നൽകി. പിന്നീട് കാർവാറിൽ വെച്ച് എത്തിയ ആർപിഎഫ് ഉദ്യോഗസ്ഥർ കുടുംബത്തിൽ നിന്ന് വിവരങ്ങൾ ശേഖരിച്ചു. തുടർനടപടികളുടെ ഭാഗമായി എറണാകുളം റെയിൽവേ സ്റ്റേഷനിലും പരാതി നൽകി.
എറണാകുളം സ്റ്റേഷനിൽ പരാതി നൽകാനെത്തിയപ്പോഴാണ് ട്രെയിൻ യാത്രയ്ക്കിടെ മോഷണത്തിന് ഇരയായ നിരവധി പേരെ കാണാനായതെന്ന് മകൻ ജിയോ പറഞ്ഞു. മൊബൈൽ ഫോണുകളും മറ്റ് വിലപിടിപ്പുള്ള വസ്തുക്കളും നഷ്ടപ്പെട്ടവരായിരുന്നു ഇവരിൽ പലരുമെന്നും അദ്ദേഹം വ്യക്തമാക്കി.
കൊങ്കൺ പാതയിൽ സമീപകാലത്തായി, പ്രത്യേകിച്ച് കഴിഞ്ഞ രണ്ട് മാസത്തിനിടെ, നിരവധി മോഷണങ്ങൾ റിപ്പോർട്ട് ചെയ്യപ്പെടുന്നതായാണ് യാത്രക്കാരുടെ പരാതി. രാത്രി യാത്രയ്ക്കിടെ ഉറങ്ങുന്നവരെ ലക്ഷ്യമിട്ടുള്ള ഇത്തരം മോഷണങ്ങൾ മലയാളികൾ ഉൾപ്പെടെയുള്ള യാത്രക്കാരുടെ സുരക്ഷയെക്കുറിച്ച് ഗുരുതരമായ ആശങ്ക ഉയർത്തുകയാണ്.
യാത്രക്കാരുടെ ലഗേജുകളും മൊബൈൽ ഫോണുകളും വിലപിടിപ്പുള്ള വസ്തുക്കളും സുരക്ഷിതമല്ലെന്ന സാഹചര്യം റെയിൽവേ യാത്രകളിൽ ഭീതി വർധിപ്പിക്കുന്നു. സ്ത്രീകളും കുടുംബങ്ങളുമായി യാത്ര ചെയ്യുന്നവരുമാണ് ഇത്തരം സംഭവങ്ങളിൽ പ്രത്യേകിച്ച് ആശങ്കപ്പെടുന്നത്.
കൊങ്കൺ പാതയിലെ തുടർച്ചയായ മോഷണങ്ങൾ തടയാൻ ട്രെയിനുകളിൽ ആർപിഎഫ് നിരീക്ഷണം ശക്തമാക്കണമെന്നും രാത്രികാല പട്രോളിങ് കാര്യക്ഷമമാക്കണമെന്നും യാത്രക്കാർ ആവശ്യപ്പെടുന്നു. ട്രെയിൻ യാത്രക്കാരുടെ സുരക്ഷ ഉറപ്പാക്കാൻ റെയിൽവേ അടിയന്തര നടപടി സ്വീകരിക്കണമെന്ന ആവശ്യവും ശക്തമാകുകയാണ്.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News
