ലോകമെമ്പാടും റിലീസ് ചെയ്തതിന് പിന്നാലെ വലിയ വിവാദത്തിലായ എമ്പുരാനിൽ വേണ്ട മാറ്റങ്ങൾ വരുത്താൻ നിർദ്ദേശവുമായി നിർമ്മാണ പങ്കാളിയായ ഗോകുലം ഗോപാലൻ. ഒരു പ്രമുഖ ഓൺലൈൻ മാധ്യമത്തിന് നൽകിയ അഭിമുഖത്തിലാണ് ചിത്രം ആരെയും വേദനിപ്പിക്കാൻ എടുത്തതല്ലെന്നും വേണ്ട നടപടി സ്വീകരിക്കാൻ സംവിധായകൻ പൃഥ്വിരാജിനോട് പറഞ്ഞിട്ടുണ്ടെന്നും ഗോകുലം ഗോപാലൻ വ്യക്തമാക്കിയത്.
ജനപ്രിയ താരങ്ങൾ അഭിനയിച്ച സിനിമ പ്രതിസന്ധിയിലായ ഘട്ടത്തിലാണ് നിന്ന് പോകരുതെന്ന ഉദ്ദേശത്തോടെ സിനിമയുമായി സഹകരിച്ചതെന്നും ഗോകുലം ഗോപാലൻ പറഞ്ഞു. അതെ സമയം സിനിമയ്ക്ക് പ്രശ്നങ്ങൾ ഉണ്ടെന്ന് തന്നെ ആരും ഔദ്യോഗികമായി അറിയിച്ചിട്ടില്ലെന്നും സിനിമ കാണുന്നവർക്ക് ബുദ്ധിമുട്ട് ഉണ്ടാകാത്ത തരത്തിൽ മാറ്റങ്ങൾ വരുത്തണമെങ്കിൽ വേണ്ട നടപടികൾ ഉടനെ ചെയ്യണമെന്നും സംവിധായകനോട് പറഞ്ഞിട്ടുണ്ടെന്നും ഗോകുലം ഗോപാലൻ പറഞ്ഞു.
അതെ സമയം ചിത്രം ആദ്യ ദിവസം തന്നെ നൂറു കോടി ക്ലബ്ബിൽ കയറിയെന്നും ഒരാഴ്ച കൊണ്ട് തന്നെ മുടക്ക് മുതൽ തിരിച്ചു പിടിക്കുമെന്ന വിവരങ്ങളാണ് പുറത്ത് വരുന്നത്. വിവാദം മാർക്കറ്റിംഗ് തന്ത്രമായാണ് ട്രേഡ് പണ്ഡിറ്റുമാർ വിലയിരുത്തുന്നത്.
