നവി മുംബൈ: പ്രവാസി ഇൻഷുറൻസ് പദ്ധതിയുടെ പ്രീമിയത്തിലുണ്ടായ വൻ വർധനവിനും പ്രവാസി ക്ഷേമ പെൻഷൻ വിതരണത്തിലെ കാലതാമസത്തിനുമെതിരെ മുംബൈയിലെ മലയാളി സംഘടനകൾ പ്രതിഷേധത്തിനൊരുങ്ങുന്നു. കേരളീയ കേന്ദ്ര സംഘടനയുടെ (കെ.കെ.എസ്.) ആഭിമുഖ്യത്തിൽ വിവിധ മലയാളി സമാജങ്ങളെയും സാമൂഹ്യ, സാംസ്കാരിക, സന്നദ്ധ സംഘടനകളെയും പങ്കെടുപ്പിച്ച് നവംബർ 3-ന് സംയുക്ത പ്രതിഷേധ യോഗം സംഘടിപ്പിക്കും.
ചൊവ്വാഴ്ച വൈകുന്നേരം 7 മണിക്ക് നവി മുംബൈ നെരൂൾ സെക്ടർ 19-ലെ ഇന്ത്യൻ മറൈൻ എഞ്ചിനീയേഴ്സ് ഇൻസ്റ്റിറ്റ്യൂട്ട് (IMEI) ഹാളിലാണ് യോഗം.
പ്രവാസി ഇൻഷുറൻസ് പദ്ധതിയുടെ വാർഷിക പ്രീമിയത്തിലുണ്ടായ ഗണ്യമായ വർധനവ് നിരവധി പ്രവാസികൾക്ക് അധിക സാമ്പത്തിക ബാധ്യതയായി മാറിയിരിക്കുകയാണ്. ഇതിനു പുറമെ പ്രവാസി ക്ഷേമ പെൻഷൻ കൃത്യസമയത്ത് ലഭിക്കാത്തതും പ്രവാസികൾക്കിടയിൽ കടുത്ത ആശങ്കയ്ക്ക് ഇടയാക്കിയിട്ടുണ്ട്.
ഈ വിഷയങ്ങളിൽ മഹാരാഷ്ട്രയിലെ പ്രവാസി മലയാളികളുടെ പ്രതിഷേധവും ആശങ്കയും കേരള മുഖ്യമന്ത്രിയുടെയും സംസ്ഥാന സർക്കാരിന്റെയും ബന്ധപ്പെട്ട അധികാരികളുടെയും ശ്രദ്ധയിൽപ്പെടുത്തുകയാണ് യോഗത്തിന്റെ പ്രധാന ലക്ഷ്യം. നിലവിലെ തീരുമാനങ്ങൾ പുനഃപരിശോധിച്ച് പ്രവാസികൾക്ക് അനുകൂലമായ തിരുത്തൽ നടപടികൾ സ്വീകരിക്കണമെന്ന ആവശ്യവും യോഗം മുന്നോട്ടുവയ്ക്കും.
പ്രീമിയം വർധനവ് നേരിടുന്ന ഇൻഷുറൻസ് പോളിസി ഉടമകൾ ഉൾപ്പെടെ മുംബൈയിലെ മുഴുവൻ പ്രവാസി മലയാളികളും വിവിധ സംഘടനകളുടെ ഭാരവാഹികളും പ്രവർത്തകരും യോഗത്തിൽ പങ്കെടുത്ത് പ്രതിഷേധം രേഖപ്പെടുത്തണമെന്ന് കേരളീയ കേന്ദ്ര സംഘടന അഭ്യർത്ഥിച്ചു. വിഷയങ്ങളിൽ തുടർനടപടികൾ സ്വീകരിക്കുന്നതിനും കൂട്ടായ പ്രവർത്തനങ്ങൾ ശക്തിപ്പെടുത്തുന്നതിനും യോഗം വേദിയാകുമെന്നും സംഘടന അറിയിച്ചു.
യോഗത്തിന്റെ വിശദാംശങ്ങൾ
- തീയതി: 2026 നവംബർ 3, ചൊവ്വാഴ്ച
- സമയം: വൈകുന്നേരം 7 മണി
- വേദി: ഇന്ത്യൻ മറൈൻ എഞ്ചിനീയേഴ്സ് ഇൻസ്റ്റിറ്റ്യൂട്ട് (IMEI) ഹാൾ
- വിലാസം: Plot No. 94, Sector 19, Nerul East, Navi Mumbai
- ലാൻഡ്മാർക്ക്: സീവുഡ് റെയിൽവേ സ്റ്റേഷന് എതിർവശം
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News
