നവി മുംബൈ: മലയാളത്തിന്റെ മധുരവും പഴയകാല ചലച്ചിത്രഗാനങ്ങളുടെ ഗൃഹാതുരത്വവും കോർത്തിണക്കി കൈരളി സി.ബി.ഡി.യുടെ കേരളപ്പിറവി ആഘോഷം സംഗീതസായാഹ്നമായി. സി.ബി.ഡി. ബേലാപൂരിലെ കൈരളി ഹാളിൽ നടന്ന പരിപാടി മലയാള ഭാഷയുടെയും കേരളത്തിന്റെ കലാ-സാംസ്കാരിക പൈതൃകത്തിന്റെയും ഓർമകൾ പുതുക്കുന്ന വേദിയായി.
‘മലയാളിമയും ചലച്ചിത്ര ഗാനങ്ങളും’ എന്ന പ്രമേയത്തിൽ സംഘടിപ്പിച്ച സംഗീതപരിപാടി പ്രശസ്ത ഗാനരചയിതാവും സംഗീതസംവിധായകനും ഗായകനുമായ ഇ.പി. സജീവനാണ് നയിച്ചത്. മലയാള സിനിമയിലെ പ്രിയപ്പെട്ട പഴയകാല ഗാനങ്ങളിലൂടെയും അവയുടെ പിന്നിലെ ഓർമകളിലൂടെയും മലയാളിയുടെ സംഗീതലോകത്തേക്കുള്ള യാത്രയായിരുന്നു പരിപാടിയുടെ ആശയം.
മലയാള ഭാഷയോടും കേരളീയ സംസ്കാരത്തോടുമുള്ള ആദരവ് പുതുക്കുന്നതിനൊപ്പം പുതിയ തലമുറയ്ക്ക് മലയാള ചലച്ചിത്രഗാനങ്ങളുടെ സമ്പന്നമായ പാരമ്പര്യം പരിചയപ്പെടുത്തുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.
കൈരളി സി.ബി.ഡി. പ്രസിഡന്റ് ജി. കൊമളൻ അധ്യക്ഷത വഹിച്ചു. സെക്രട്ടറി ഇ. രാമദാസൻ സ്വാഗതവും ട്രഷറർ ബിനു പാപ്പച്ചൻ നന്ദിയും രേഖപ്പെടുത്തി.
കേരളപ്പിറവി ദിനത്തിൽ പ്രവാസി മലയാളികളുടെ സാംസ്കാരിക കൂട്ടായ്മയും മലയാളത്തിന്റെ സംഗീതപാരമ്പര്യവും ഒരുമിപ്പിച്ച പരിപാടിയായി കൈരളി സി.ബി.ഡി.യുടെ ആഘോഷം ശ്രദ്ധേയമായി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News
