മുംബൈ: കേരളത്തിന്റെ സാംസ്കാരിക പൈതൃകവും മഹാരാഷ്ട്രയുടെ ആഘോഷപ്പെരുമയും ഒരുപോലെ ചേർത്തുപിടിച്ച് മുളുണ്ട് കേരള സമാജം. ദീപാവലി ആഘോഷങ്ങളുടെ ഭാഗമായി സമാജം പ്രവർത്തക സമിതിയുടെ ആഭിമുഖ്യത്തിൽ ലക്ഷ്മി പൂജ സംഘടിപ്പിച്ചു.
സമാജം പ്രസിഡന്റ് ടി.കെ. രാജേന്ദ്ര ബാബു ദീപം തെളിയിച്ച് പൂജയ്ക്ക് തുടക്കം കുറിച്ചു.
മാതൃസംസ്ഥാനമായ കേരളത്തിന്റെ പൈതൃകവും ആഘോഷങ്ങളും സാംസ്കാരിക സ്വത്വവും സംരക്ഷിക്കുന്നതിനൊപ്പം, കർമ്മഭൂമിയായ മുംബൈയിലെയും മഹാരാഷ്ട്രയിലെയും ദീപാവലി, ഗണേശോത്സവം, നവരാത്രി തുടങ്ങിയ ആഘോഷങ്ങളിലും സജീവമായി പങ്കുചേരുകയാണ് സമാജത്തിന്റെ ലക്ഷ്യമെന്ന് പ്രസിഡന്റ് രാജേന്ദ്ര ബാബു പറഞ്ഞു. ജീവകാരുണ്യ പ്രവർത്തനങ്ങൾക്കും സമാജം പ്രത്യേക പ്രാധാന്യം നൽകുന്നുണ്ടെന്നും അദ്ദേഹം കൂട്ടിച്ചേർത്തു.
സമാജം വൈസ് പ്രസിഡന്റ് എ. രാധാകൃഷ്ണൻ, ജനറൽ സെക്രട്ടറി ബി.കെ.കെ. കണ്ണൻ, സെക്രട്ടറി ഇടശ്ശേരി രാമചന്ദ്രൻ, സുജാത നായർ, കമ്മിറ്റി അംഗങ്ങളായ കെ. ബാലകൃഷ്ണൻ നായർ, എ.വി. കൃഷ്ണൻ, ടി.കെ. ബാലചന്ദ്രൻ, സുരേഷ് നായർ, സുപ്രിയ നായർ എന്നിവർ പൂജാ ചടങ്ങുകൾക്ക് നേതൃത്വം നൽകി.
ഡോ. ദിനേശൻ നമ്പൂതിരി, ഡിസ്പെൻസറി അസിസ്റ്റന്റ് നളിനി നായർ, സമാജം ആയുർവേദ ഡിസ്പെൻസറിയുടെ പുതിയ നടത്തിപ്പുകാരായ തതാസ്തു കേരള ആയുർവേദയിലെ രണഞ്ജയ് പാണ്ഡെ, പാരുൽ സേതിയ പാണ്ഡെ എന്നിവരും സമാജം കമ്മിറ്റി അംഗങ്ങളുടെ കുടുംബാംഗങ്ങളും ചടങ്ങിൽ പങ്കെടുത്തു.
കേരളത്തിന്റെ പാരമ്പര്യവും മഹാരാഷ്ട്രയുടെ സാംസ്കാരിക ആഘോഷങ്ങളും പരസ്പരം ചേർത്തുപിടിക്കുന്ന സമാജത്തിന്റെ പ്രവർത്തനങ്ങൾക്ക് ഈ ദീപാവലി ആഘോഷം മറ്റൊരു അടയാളമായി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News
