അജ്മാൻ: അധ്യാപനത്തിലൂടെയും സാഹിത്യസൃഷ്ടികളിലൂടെയും മലയാള ഭാഷയ്ക്കും സമൂഹത്തിനും വിലപ്പെട്ട സംഭാവനകൾ നൽകിയ ദേശീയ അധ്യാപക പുരസ്കാര ജേതാവ് പി.കെ. ഭരതൻ മാസ്റ്ററെ കരുവന്നൂർ പ്രവാസികളുടെ കൂട്ടായ്മയായ ഏക യു.എ.ഇ (Expatriates of Karuvannur) ആദരിച്ചു.
നവംബർ എട്ടിന് അജ്മാനിലെ തുംബേ മെഡിസിറ്റിയിൽ സംഘടിപ്പിച്ച ‘സ്നേഹാദരം’ ചടങ്ങിൽ മാസ്റ്ററെ പൊന്നാട അണിയിക്കുകയും സ്നേഹോപഹാരം സമർപ്പിക്കുകയും ചെയ്തു.
ഏക യു.എ.ഇ ചെയർമാൻ കിഷോർ കുമാറിന്റെ അധ്യക്ഷതയിൽ നടന്ന ചടങ്ങ് ഗുരുശിഷ്യബന്ധത്തിന്റെ ഊഷ്മളമായ ഓർമകൾ പങ്കുവെച്ച വേറിട്ട സംഗമമായി. മൂർക്കനാട് സെന്റ് ആന്റണീസ് ഹൈസ്കൂളിൽ ഭരതൻ മാസ്റ്ററുടെ വിദ്യാർത്ഥിയായിരുന്ന കിഷോർ കുമാർ, മാഷിന്റെ മലയാളം ക്ലാസുകളെയും സ്കൂൾകാല അനുഭവങ്ങളെയും അനുസ്മരിച്ചു.
ജോബ് ചിറ്റിലപ്പിള്ളി സ്വാഗതവും ട്രഷറർ നബീൽ ബക്കർ നന്ദിയും പറഞ്ഞു.
മാസ്റ്ററുടെ പൂർവ്വ വിദ്യാർത്ഥികളായ മാത്യൂസ് സെൽവൻ, രാജേഷ്, ഷാജി അബ്ബാസ്, ചാർളി, ജോബ്, നിതിൻ, ബെന്നി, ബിനോയ് എന്നിവർ ചടങ്ങിൽ സംസാരിച്ചു. അധ്യാപകനെന്ന നിലയിൽ ഭരതൻ മാസ്റ്റർ തങ്ങളുടെ ജീവിതത്തിൽ ചെലുത്തിയ സ്വാധീനവും സ്കൂൾകാലത്തെ മറക്കാനാവാത്ത അനുഭവങ്ങളും അവർ പങ്കുവെച്ചു.
മറുപടി പ്രസംഗത്തിൽ തന്റെ അധ്യാപനജീവിതത്തിലെ അനുഭവങ്ങളും പഴയ വിദ്യാർത്ഥികളുമായുള്ള ഹൃദയബന്ധവും ഭരതൻ മാസ്റ്റർ അനുസ്മരിച്ചു. ഏക യു.എ.ഇ ഭാരവാഹികളും രക്ഷാധികാരികളും അംഗങ്ങളും ചടങ്ങിൽ പങ്കെടുത്തു.
അധ്യാപനത്തിനൊപ്പം കഥ, നോവൽ, ചലച്ചിത്ര തിരക്കഥ എന്നീ മേഖലകളിലും വ്യക്തിമുദ്ര പതിപ്പിച്ച വ്യക്തിയാണ് പി.കെ. ഭരതൻ മാസ്റ്റർ. ‘ശ്രീരാഗം’, ‘പി.കെ. ഭരതന്റെ കഥകൾ’, ‘സിനിമയുടെ ഗൃഹപാഠം’ എന്നിവ അദ്ദേഹത്തിന്റെ ശ്രദ്ധേയമായ കൃതികളാണ്.
കാലം എത്ര കടന്നുപോയാലും അധ്യാപകനും വിദ്യാർത്ഥികളും തമ്മിലുള്ള ബന്ധത്തിന് മങ്ങലേൽക്കുന്നില്ലെന്ന സന്ദേശം പകർന്നുനൽകുന്നതായി ഏക യു.എ.ഇയുടെ ഈ ആദരസംഗമം.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News
