മഹാരാഷ്ട്രയിൽ ഖോപോളിയിലെ ഫ്ലാറ്റിൽ ഒറ്റയ്ക്ക് താമസിച്ചിരുന്ന മലയാളി വയോധികയെ ക്രൂരമായി കൊലപ്പെടുത്തിയ സംഭവത്തിൽ അടിമുടി ദുരൂഹത.

71 വയസ്സുകാരിയായ മഹേശ്വരി രാമചന്ദ്രൻ പണിക്കറെ ഫ്ലാറ്റിൽ കൈകാലുകൾ ബന്ധിച്ച നിലയിലാണ് കൊല്ലപ്പെട്ട നിലയിൽ കണ്ടെത്തിയത്.

കൊലപാതകത്തിന് പിന്നിലെ ദുരൂഹത നീക്കാൻ വിപുലമായ അന്വേഷണമാണ് പോലീസ് നടത്തുന്നത്. ബന്ധുക്കളെയും സുഹൃത്തുക്കളെയും കൂടാതെ മഹേശ്വരിയുമായി പരിചയമുണ്ടായിരുന്ന പ്രദേശത്തെ മലയാളികൾ, സമീപത്തെ കടക്കാർ, ക്ഷേത്രവുമായി ബന്ധപ്പെട്ടവർ എന്നിവരെയും പോലീസ് പലതവണ ചോദ്യം ചെയ്തതായ വിവരങ്ങളാണ് പുറത്ത് വരുന്നത്. സംശയമുള്ളവരുടെ വിരലടയാളങ്ങളും ശേഖരിച്ചിട്ടുണ്ട്.

മഹേശ്വരിയുടെ മൊബൈൽ ഫോൺ ഫോർമാറ്റ് ചെയ്ത നിലയിലാണ് പോലീസിന് ലഭിച്ചത്. ഇതിൽനിന്ന് ഡിജിറ്റൽ ഡാറ്റ വീണ്ടെടുത്ത ശേഷമാണ് അന്വേഷണം കൂടുതൽ പേരിലേക്ക് വ്യാപിപ്പിച്ചത്. ഫോൺ വിവരങ്ങളിൽനിന്ന് ലഭിച്ച സൂചനകളും പോലീസ് പരിശോധിക്കുന്നുണ്ട്. ഇതുമായി ബന്ധപ്പെട്ട് സീനിയർ ഓഫീസർമാരുടെ അടിയന്തിര യോഗങ്ങളും നടക്കുന്നുണ്ടെന്നാണ് അറിയാൻ കഴിഞ്ഞത്.

അതേസമയം, കൊലപാതകവുമായി ബന്ധപ്പെട്ട പോസ്റ്റ്‌മോർട്ടം റിപ്പോർട്ട് ഇതുവരെ പോലീസ് പുറത്തുവിട്ടിട്ടില്ല. ബന്ധുക്കളും പ്രദേശത്തെ മലയാളികളും വലിയ ആശങ്കയിലാണ്.

വീട്ടിലെ അലമാരയിലെ സാധനങ്ങൾ വാരിവലിച്ചിട്ട നിലയിലായിരുന്നു. കൂടാതെ, വയോധിക ധരിച്ചിരുന്ന സ്വർണ്ണമാലയും രണ്ട് സ്വർണ്ണവളകളും നഷ്ടപ്പെട്ടിട്ടുണ്ട്.

ഉച്ചയ്ക്ക് 12 മണിക്കും 2 മണിക്കും ഇടയിലാണ് മരണം സംഭവിച്ചതെന്നാണ് പ്രാഥമിക സൂചന

പ്രതികളെ പിടികൂടാനായി ഖലാപൂർ ഡിവിഷനിൽ നിന്നുള്ള 6 ടീമുകളും ലോക്കൽ ക്രൈം ബ്രാഞ്ചിന്റെ 6 ടീമുകളും ഉൾപ്പെടെ 12 പ്രത്യേക അന്വേഷണ സംഘങ്ങൾ രൂപീകരിച്ചിട്ടുണ്ടെന്നും അടുത്ത രണ്ടുമൂന്ന് ദിവസത്തിനുള്ളിൽ പ്രതികളെ അറസ്റ്റ് ചെയ്യാനാകുമെന്നും സീനിയർ പോലീസ് ഇൻസ്പെക്ടർ സച്ചിൻ ഹിരെ പറയുന്നു.

മോഷണം മാത്രമാണോ കൊലപാതകത്തിന് പിന്നിൽ, അതോ മറ്റെന്തെങ്കിലും ആസൂത്രിത നീക്കമുണ്ടോ തുടങ്ങിയ ചോദ്യങ്ങൾ ഇപ്പോഴും ബാക്കിയാണ്.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News